Contra a repressom espanhola, solidariedade com as pessoas detidas no País Basco

NÓS-Unidade Popular quer mostrar a sua solidariedade com as 8 pessoas detidas pola Guarda Civil em diversas vilas e cidades do País Basco. Estas 8 pessoas som interlocutoras do EPPK (Coletivo de Presas e Presos Políticos Bascos) e fôrom detidas no decurso de umha operaçom decretada pola Audiência Nacional espanhola, o tribunal fascista especializado em perseguir a disidência política.

Rejeitamos esta operaçom repressiva contra a esquerda abertzale e contra o povo basco. As razons por trás da mesma som evidentemente políticas e demonstram que o Estado espanhol é reacionário até o cerne e que só busca destruir os movimentos de libertaçom nacional das naçons que oprime.

Como sempre figemos, seja qual for o contexto político, transmitimos também a nossa solidariedade e apoio à esquerda abertzale e encorajamos o povo trabalhador basco a continuar a luitar pola sua liberdade e polo socialismo.

Seguindo as dinámicas intrinsecamente reacionárias e fascistizantes que caraterizam a natureza do Estado espanhol, hoje foi proibida o direito do povo basco a dar umha resposta massiva em defesa dos direitos dos e das presas bascas.

Eis a democracia espanhola: a das proibiçons, da censura, manipulaçom, intoxicaçom, torturas, guerra suja …

Direçom Nacional de NÓS-Unidade Popular