Apresentado concerto “Chávez Sempre, homenagem nacional à Revoluçom Bolivariana”

Hoje pola manhá na Galeria Sargadelos de Vigo tivo lugar a apresentaçom oficial do concerto “Chávez Sempre”, que terá lugar o vindouro sábado 15 de março às 19h no teatro Garcia Barbom de Vigo.

Na apresentaçom interviu Xavier Moreda, coordenador geral da AGARB, realizando um apelo a assistir ao concerto como monstra de apoio ao processo revolucionário bolivariano em curso.

Frente à manipulaçom mediática que tergiversa a realidade venezuelana, Xavier Moreda manifestou o apoio ao governo legítimo do presidente Nicolás Maduro, submetido a umha estratégia fascista de golpe de estado promovido pola oligarquia que nom aceita os resultados eleitorais de abril e dezembro de 2013.

Moreda sinalou a importância de transmitir um forte apoio a um governo que está confrontando-se a umha campanha desestabilizadora implementada pola oligarquia venezolana com apoio dos Estados Unidos e a Colômbia “pois a melhor forma de solidarizar-se com a Venezuela bolivariana e chavista é lotar até a bandeira o teatro Garcia Barbom mediante a colaboraçom simbólica de 5 euros”.

Representaçom da música galega

Diversos géneros e estilos musicais estarám presentes o vindouro 15 de março.

Sés, Liska!, Os Tres Trebóns, Ondas del Caribe, Xosé Constenla, Zurrumalla e Uxia e Sérgio Tannus colaboram solidariamente com esta iniciativa de apoio à Revoluçom Bolivariana, coincidindo com o primeiro aniversário do falecimento do comandante Hugo Chávez.

Arroupo político e social

Na conferência de imprensa assistírom representantes de organizaçons políticas, sindicais e sociais da esquerda soberanista e independentista galega que adirem à iniciativa. Alberte Mera, secretário geral de Galiza Nova, Xosé Colaço, secretário geral do PCPG, Serafim Otero, secretário comarcal da CIG Vigo, Carlos Morais, secretário geral de Primeira Linha, Manuel Caride, responsável comarcal de BNG de Vigo, Jurjo Diz, responsável comarcal de AGIR de Vigo, Diego Santório, de Mar de Lumes, Pablo Romero, da Liga Estudantil Galega, e Iago Moreno, responsável comarcal de NÓS-Unidade Popular de Vigo.