lahaine.org
Nacionales Galiza :: 01/10/2019

[Galego] Protesta contra Filipe VI “por rei, por anacrónico e por antigalego”

Sermos Galiza
Dous centos de persoas concentráronse diante da Reitoría da UDC na Coruña para protestar pola visita de Filipe VI na inauguración do curso académico

A concentración desta segunda feira na Coruña diante do Paraninfo. Dous centos de persoas concentráronse diante da Reitoría da UDC na Coruña para protestar pola visita de Filipe VI na inauguración do curso académico. Amplo despregue policial e de medios informativos para dar cobertura ao rei.

“A monarquía é unha institución que nega o dereito elemental dun pobo, como é o dereito á autodeterminación, o dereito a decidir. Pero ademais trátase dunha institución totalmente anacrónica e antidemocrática”, dixo Anxo Louzao, portavoz de Vía Galega, a plataforma que convocou a protesta, minutos antes da chegada do monarca, que accedeu ao recinto do Paraninfo pola porta oposta á que se encontraban os manifestantes.

Un policía cada cen metros desde os Xardíns de Méndez Núñez até O Parrote, e despois do hospital Abente e Lago, unhas cantas ducias máis deles. Autoridades, con ampla presenza de políticos socialistas, e xornalistas e reporteiros gráficos agardaban a chegada de Filipe VI na porta sur do Paraninfo da UDC. Diante da outra porta, a do norte, xunto ás murallas da Cidade Vella, dous centos de persoas a berro de “Galiza non ten rei!” sostiñan faixas reclamando unha República galega e lucían bandeiras da patria e bandeiras da II República española.

Á convocatoria de Vía Galega, que reúne unhas cincuenta asociacións de diversa índole que teiman no dereito a decidir, sumáronse outras entidades da cidade, como Galiza pola República, activistas sociais, representantes do movemento veciñal e colectivos da esquerda desde o nacionalismo até o republicanismo e o anarquismo. Así, entre os manifestantes, estaban entre outros o secretario de Organización do BNG, Bieito Lobeira, o líder coruñés do BNG, Francisco Jorquera, o responsábel comarcal da CIG, Xabier Filgueira, xunto a membros de Anova ou Esquerda Unida e asociacións republicanas e veciñais.

“Inaugúrase o curso académico nunha universidade como a UDC que está a sufrir un proceso de españolización galopante e a monarquía vén aquí para dar carta de normalidade a unha situación que non deixa de ser anormal”, rematou Louzao en declaracións a Sermos Galiza.

https://www.sermosgaliza.gal/articulo/politica/protesta-filipe-vi-rei-anacronico-antigalego/20190930125146084571.html?fbclid=IwAR2IFn_NmRMx5-uxPe1WGhOPIQmmgXC8AdXxKssuPBlHDWrpltojYzNl0Lk

 

Este sitio web utiliza 'cookies'. Si continúas navegando estás dando tu consentimiento para la aceptación de las mencionadas 'cookies' y la aceptación de nuestra política de 'cookies'.
o

La Haine - Proyecto de desobediencia informativa, acción directa y revolución social

::  [ Acerca de La Haine ]    [ Nota legal ]    Creative Commons License ::

Principal