Galiza: reclaman a retirada de 124 símbolos franquistas nun total de once concellos

Presentada información de 124 símbolos franquistas das comarcas de Ferrolterra, Eume e Ortegal (Provincia da Coruña) para o catálogo de elementos contrarios á memoria democrática (Artigo 36.2. da Lei de Memoria Democrática)

Presenteino onte, luns, un escrito un escrito na Subdelegación do Goberno da Coruña para o Catálogo de elementos contrario á memoria democrática, que está a elaborar o Ministerio de Presidencia, Relacións coas Cortes e Memoria Democrática

Presento o escrito como sociólogo e vítima do franquismo, en aplicación do artigo 36.1 sobre o Catálogo da Lei de Memoria Democrática (LMD): “Poderán incluírse no mesmo aqueles elementos que se soliciten polas vítimas, os seus familiares ou as entidades memorialistas, en defensa de seu dereito ao honor e a dignidade, ou resulten de estudos e traballos de investigación.”

⇒⇒⇒Le o texto completo de 18 páxinas presentado, fai clic aquí⇐⇐⇐

O pasado 1 de setembro xa presentara documentación sobre 180 símbolos franquistas na concello da Coruña.

Estes 124 elementos contrarios á memoria democrática de 11 concellos están distribuídos así: Ferrol 65, Ares 14, Cariño 4, Fene 3, Mañón 2, Mugardos 8, Narón 7, Neda 2, Ortigueira 10, Pontedeume 8, San Sadurniño 1.

Ferrol retiraba a Manuel Fraga, ministro da ditadura, a distinción de Fillo Adoptivo o 25 de abril de 2019, pero aínda quedan en Ferrol 9 ministros da ditadura coa distinción de Fillos Adoptivos ou Predilectos: Pedro Nieto Antúnez, Pablo Martín Alonso, Juan Antonio Suanzes Fernández, Salvador Moreno Fernández, Gonzalo Fernández de la Mora, José María Martínez y Sánchez Arjona, Manuel Lora Tamayo, Jorge Vigón Suerodíaz e Fernando Suárez de Tangil. E outro ministro, José María Fernández Ladreda, dá nome a un peirao.

O Museo Naval de Ferrol, que depende do Ministerio de Defensa, ten 16 elementos contrarios á memoria democrática. Trátase dun museo de exaltación do franquismo cuns textos propios da ditadura. Refírese ao golpe de Estado de 1936 como un “alzamiento” e unha “guerra de liberación”. Fai unha exaltación de significados militares golpistas –con exhibición de medallas e distincións recibidas na ditadura, como Salvador Moreno Fernández, Francisco Moreno Fernández e Francisco Núñez Rodríguez– ou propagandistas do franquismo como o xeneral Juan Antonio Chicharro Ortega, presidente da Fundación Nacional Francisco Franco, que firma un “Decálogo del Infante de Marina”, incumprindo a Lei de Memoria Democrática.

É unha vergoña para unha sociedade democrática que Camilo Alonso Vega, significado militar golpista e ministro de Gobernación (coñecido como “Camulo” na ditadura pola represión violenta), conserve unha escultura na entrada do hospital Juan Cardona de Ferrol, que o presenta como “Hijo Ilustre de la ciudad, soldado heroico, gobernante ejemplar”, cando a corporación municipal de Ferrol xa cambiara en 1981 o nome do Parque Camilo Alonso Vega, hoxe Alexandre Bóveda, e a súa praza, entre o teatro Jofre e o edificio de Correos, é hoxe Praza de Galicia.

Hai un incumprimento da Lei de Memoria Democrática (artigo 41.1.) que retira a Juan Antonio Suanzes Fernández, ministro na ditadura, o título nobiliario de Marqués de Suanzes; As Pontes, con alcaldía socialista, retiraba a súa rúa en 2017, pero Suanzes conserva en Ferrol as distincións de Fillo Predilecto e Medalla de Ouro.

Continuadas contradicións nas actuacións dos concellos e nos propios partidos. A corporación de Ferrol retiraba en 1981 a rúa José Antonio Girón de Velasco, hoxe Ricardo Carballo Calero. En As Pontes, sendo Alcalde Valentín González Formoso, actual presidente socialista da Deputación da Coruña, retiraban por unanimidade a Medalla de Prata en 2009 a este significado fascista e ministro na ditadura, pero continúa como Fillo Adoptivo de Ortigueira.