‘Novas da Galiza’ analisa situaçom do independentismo

O número de verao do jornal mensal ‘Novas da Galiza’ pom o foco na situaçom atual do independentismo e, a partir das vozes de diversos militantes, procura desenhar a pervivência deste movimento e recolhe propostas de açom política para o futuro. No seu editorial, o ‘Novas’ expóm que “esta primeira proposta fica aberta a novas achegas e análises mais concretas e polo miúdo que podam completar as reflexons recolhidas no foco deste número”.

Esta reportagem central conta com três partes diferenciadas. Na primeira, procura-se umha definiçom da situaçom atual do independentismo, exponhem-se brevemente as transformaçons no seio das organizaçons independentistas durante o segundo decénio de XXI e finaliza com algumhas reflexons sobre essa trajetória. Esta primeira parte conta também com um quadro em que se expóm a evoluiçom do ciclo de violência política iniciado em 2005 com a publicaçom do primeiro manifesto da resistência galega.

Umha segunda parte recolhe as diferentes iniciativas unitárias do século XXI que tiveram como reivindicaçom central o direito de autodeterminaçom. Assim, diferenciam-se duas etapas: umha em que essas iniciativas eram promovidas por militantes independentistas em reaçom à toma de posiçons autonomistas por parte do BNG, e umha segunda em que é o próprio nacionalismo quem impulsa iniciativas em favor da soberania nacional. Esta segunda parte da reportagem remata com reflexons sobre a relaçom entre o independentismo e o nacionalismo hegemónico.

A terceira parte da reportagem leva por título ‘Na procura de ferramentas para o agir político’ e é a que pretende deitar umha olhada cara o futuro. Começa expondo alguns dos testemunhos que deixou a trajetória da luita independentista na Galiza, para prestar atençom depois aos ciclos eleitorais, à unidade entre a mocidade independentista e o trabalho de base que desenvolvem os centros sociais.