NÓS-UP lamenta nova vítima mortal do terrorismo machista na Galiza

Segundo informaçons proporcionadas no dia de hoje aos meios de comunicaçom, a autopsia confirma que Júlia Lourenço, de 65 anos, faleceu assassinada polo seu companheiro A.L.B, quem planificou o crime e pendurou macabras notas manuscritas informando da morte dele próprio e da sua companheira.

NÓS-Unidade Popular condena este lamentável ato de violência machista. Somos conscientes de que a soluçom nom chegará enquanto perdurar o atual sistema capitalista e patriarcal em que vivemos e por isso encorajamos mais umha vez às mulheres a darem passos na auto-organizaçom e a denúncia para combate-lo. No entanto, novamente fazemos algumhas propostas urgentes como ponto de partida a ter em conta polas instituiçons:

· Instauraçom dum modelo co-educativo de ensino galego, que elimine estereótipos e que atenda às necessidades tanto de mulheres quanto de homens, de maneira global e nom baseado em questons de género.

· Criaçom dumha rede de andares gratuitos para as mulheres vítimas da violência machista e também para as suas filhas ou filhos (se tiverem).

· Serviço de emergência as 24 horas a disposiçom das mulheres que sofrem maus tratos.

· Aumento da aplicaçom de medidas preventivas como o "afastamento", recolhidas na Lei de Ajuizamento Criminal e no Código Penal.

· Aplicaçom da Lei de protecçom de testemunhas às mulheres ameaçadas.

· Criaçom em todos os julgados do turno de ofício específico para mulheres.

· Políticas laborais que garantam o acesso ao mercado laboral das mulheres agredidas, garantindo a sua independência económica.

Para finalizar fazemos um chamamento a todas as mulheres galegas a assistir a todas as convocatórias que tenham lugar com motivo desta nova agressom machista.

Paremos o terrorismo machista!

Galiza, 5 de março de 2012